oli-ne voli, bode-nebode: naš narod nikak da si k pameti zeme nekaj kaj je već zdavnja poznato, a to je da se na ovem svetu spremiti more al čoveka nit sam čovek spremeniti nemre. Pak će je tomu tak, a ja velim da je tak, zakaj bi samo onda vreme gubili. Zapraf sem Vam štel reći da su čiste bedastoće to kaj su nekoji mislili jeli se "SPRAVIŠČE" bode obdržavalo ili ne. Baš da ste se Vi Varoški Purgeri predomislili, mi Šljivari pod Kalnikom bi makar samo svoje "autonomno Spravišće" napravili. Pa kaj Vi mislite, naše je Spravišće postalo tradicija, a tradicija je dio naroda, a narod je stopram vu denešnje vreme došel na svoje i nišće ga više curiknuti nazaj nebre. Više od jezero let smo mi pod Kalnikom sakakova "Spravišča" obdržavali. Na njih so znali dojti i oni kaj smo ih zvali,a bilo je čudaj onih kaj su sami došli pak onda nismo znali kak da ih se rešimo. Istina niti mi baš nismo bili "sveta vodica" gda smo se znali spustiti vu varoš križevačku. Purgeri su zbog radi svoje "ugroženosti" zmislili "Štatute" pak će se kakov zbantuvlivec našel vu pajdašiji, lepo ga je legalno zebrani "vunbacitel" prijel za kraglec i spelal brez velike parade na friški luft. Će pak se dotična peršona išla žalit na magistrat da su ga "paravojno formacijski vunbaciteli" ugrozili, onda je od legalno imenovanih pandurof fasoval još dvajsti pet po plećima pak si je drugi put spremislil kak se bu ponašal. Denes su pak došla ćistam druga vremena. Više čovek nezna gdo je domorodec a gdo dotepenec. Do malo predi se je čudaj ljudi po skrivečki križalo a, vu zajdne vreme se križaju i oni kaj nigdar vu cerkvi nisu bili. Samo ve pak treba paziti s koliko prsti se križaš. Stalno neko nekoga ugrožava a ja vam velim da smo mi Kalničani od navek strašno ugroženi gda nas potere toća ili ofuri mraz. Gda gorice slabo rodiju najrajši bi se vgrizel za čelo, ali niti to već nesmem jer bi mi mam prišlopili da sem genocidni. Zato bomo mi i dale obrdžavali naše "SPRAVIŠČE", lepo bomo se kak pošteni ljudi posvadili že bode trebalo se mi znamo i pomiriti, a će mene pitate za mišlejne, ja još naveke trdo mislim "da je najbole dok je čovek zdrav"!

Cifrasto Vas pozdravla
Kalnički Kaštelan